வெள்ளைப் பூக்களின் … பயணம் !
‘பொற்கிழி’ கவிஞர் தமிழ்மாமணி மு. ஹிதாயத்துல்லா இளையான்குடி
ஹஜ்ஜுக்குச் செல்வோரும்
உம்ராவுக்குச் செல்வோரும்
அல்லாஹ்வின் விருந்தினர்கள் என்று
அபூஹுரைரா (ரலி) அவர்கள்
அறிவித்துள்ளார்கள் !
அதன்படி,
புனித ஹஜ்ஜுக்குப் புறப்படும்
வெள்ளைப் பூக்களே !
எதுவும் எனதில்லை
எல்லாமே உனது என்றே
எல்லாம் துறந்து
ஏகனே கதியென்று செல்லும்
இறைக் காதலர்களே …!
உங்கள் தாகம் புரிகிறது
பாலைவனமே ……..
தாகமாய் படுத்திருக்க அந்தப்
பாலைவனச் சீமைக்கா……
உங்கள் பயணம் என்று……
கேட்கலாம் போல் தோன்றுகிறது !
அது
பாலைவனமல்ல
தீன்பூத்த சோலைவனம் !
ஓரிறைத் தத்துவத்தை – அந்த
வானத்திற்கும்
வகுப்பெடுத்துக் கொண்டிருக்கும்
சங்கையான கஃபா
மக்க நகரத்தின் மணிமகுடம் !
இந்தச் சீமையில் தான்
வல்ல அல்லாஹ் – தன் இறுதித்
தூதுவரை ….
நபியாகத் தேர்ந்தெடுத்தான் !
உம்மி நபியானவரை…
உலகமே … படிக்க வைத்தான்
கலிமாவைத் தினமும்
நாம் ஓத…...
அவர்கள் நாமத்தை
இனிப்பாய் அதில்
இணைத்து வைத்தான் !
அன்று……
அன்னை ஹாஜரா …
பாறைகளுக்கிடையில்
நீரைத்தேடி…
தாகத்தோடு… அலைய…….
குழந்தை இஸ்மாயிலின்
குதிகால் உதைப்பினிலே
தெறித்ததே… ஒரு நீரூற்று !
அது சாதாரண ஊற்றல்ல,
ஜம் ஜம் நீரூற்று !
அன்று முதல் … இன்று வரை
அதன் ஊற்றுக் கண்…
திறந்தபடியே ….
தாகம் தீர்த்து வருகிறது !
இப்போது தான் புரிகிறது !
உலகத்தின் தாகம் தீர்ப்பதே
அந்தப்
பாலைவனச் சீமையென்று !
இதையெல்லாம் ….
கண்ணாரக்கண்டுவரப்
போகின்றீர்கள் !
சென்று வாருங்கள் !
உங்களின் ஹஜ்
வல்ல அல்லாஹ்வால்
ஒப்புக் கொள்ளப்பட்ட
ஹஜ்ஜாக அமைய…..
துஆச் செய்கிறோம் !
தோழமையோடு !
அல்லாஹு அக்பர் !
© TamilIslamicAudio.com
