விரக்திக்கு விடைகொடு!

(தத்துவக் கவிஞர் இ பத்ருத்தீன் - அலைபேசி : 9444272269)

இளைஞனே !
வெட்டுவதும், துண்டிப்பதும் தான் வேலையென்றாலும், கத்தரிக்கோலை எவரும் கைது செய்யக் கோருவதில்லை !
அடிப்பதற்குச் சம்மட்டியை அருகிலேயே வைத்துக்கொண்டு – சிறு தீப்பொறியை வெங்கனலாக ஊதிப் பெருக்குவதே வேலையென்றாலும்-பட்டறைத் துருத்தியை எவரும் பழிப்பதில்லை !
வெடிக்கச் செய்வதற்கும் வெட்டிப் பிளப்பதற்கும் துணை நிற்கிறது என்றாலும், மலைக் குன்றுகளை உடைக்கும் வெடி மருந்துகளை எவரும் மறுதலிப்பதில்லை !
அழிவுக்கு அடுப்பூதாமல், ஆக்கங்களுக்கு அக்னியாகின்ற எவையொன்றும் வரவேற்பு வாசிக்கப்படும்; அதற்கு உடன்பாடாகும் போது உனக்கும் வாழ்த்துரைக்கப்படும் !
 
இளைஞனே !
நீயும் ஒரு நெருப்பு தான் !
நெருப்பில்லாமல் நீராவியில்லை; நீராவியில்லாமல் உந்து சக்திகள் உடைதரிப்பதில்லை.
நீ அமர்ந்திருப்பதே அரசத் தோரணை என்னும் போது – நீ நிமிர்ந்து நிலை கொள்ளத் தொடங்கி விட்டால் –
அதிகார அக்னிக் குழம்பைத் துப்பும் எரிமலை கூட வேறு இருப்பிடத்தைத் தேட வேண்டியதேற்பட்டுவிடும் !
நீ அளவில் குண்டுமணிதான் ! ஆனால், தங்கத்தை நிறுக்க உனையன்றி தரணியில் எவர்?
நீ அற்பக் குண்டூசிதான். ஆனால், சேவகப் பட்டியலை உனையன்றி சேகரித்து வைக்க வல்லவர் எவர்?
 
இளைஞனே !
நீ கைகட்டிக் கொண்டிருந்தால், முன்னேற்றங்கள் கால் கட்டிக் கொண்டிருக்க நேரும்;
நீ வெள்ளோட்டங்கள் கொண்டு விட்டால், வெற்றியெலாம் – உன் மீதே கண்ணோட்டங் கொண்டு விடும் !
துணிவு கொள் வருகையாளனுக்குத்தான் வரவேற்பு மாலையே அன்றி – பயந்து ஒதுங்குபவனுக்கன்று உயர மேடைகள் ! எனினும் –
நீ படைப்பது பசிக்குச் சோறானால், எவரையும் எதிர்பார்க்கத் தேவையில்லை
நீ உடைப்பது அடுப்புக்கு விறகானால், எவரது உத்தரவுக்காகவும் உட்கார்ந்து கொண்டிருக்க வேண்டிய அவசியமில்லை !
நீ அடைப்பது, அணையின் விரிசலென்றால் எத்தகைய தனி ஆணைக்காகவும் தாமதிக்க வேண்டியதில்லை !
ஆனால்,
நீ கொளுத்துவது விளக்குத் திரியேயென்றாலும் கூரை வீடுகள் அக்கம்பக்கம் இருப்பதைக் கவனங் கொள் !
நீ தீட்டுவது அரிவாள்மனையேயென்றாலும், விபரீத விளையாட்டுப் பிள்ளைகளும் உடன் உள்ளார்கள் என்பதை விளங்கிக் கொள் !
நீ குடிப்பது பாலே என்றாலும், நிற்பது பனைமரத்து நிழலாக இல்லாமல் பார்த்துக் கொள் !
உன் பூர்ணிமைப் பொழுதுகளில் நீ பூக்களைப் பறித்தாலும், வேர்களைப் பறிக்கும் வேலையென்பதாக –
உன் நிம்மதிகளைக் கால்கோலவிடாமல் கால் தடுக்கி விடலாம் !
எனவே, உன் சுட்டுவிரல் நிழல் கூட துப்பாக்கி முனையாகத் தப்பர்த்தம் கொண்டுவிட நீ காரணமாகி விடாதே !
 
இளைஞனே !
வயிற்றுப் பாட்டுக்கே நீ வாய்ப்பாடு பாடிக் கொண்டிருக்கும் போது –
வாழ்க்கைப் பயன்பாட்டில் உன் முயற்சி சிறகுகளின் அவசிய விரிவைக் கூட அனாவசியத் தடுப்புகள் ; தடைகள் !
இந்தப் புகை மூட்டங்களுக்கிடையேயும் நீ, தன்னந்தனியாய் – உன் தண் முகத்தைக் காட்ட வேண்டிய தலையெழுத்துனக்கு !
விரக்திக் கண்ணிவெடிகள் உன் வீதியெங்கும் தான்; எனினும் –
வெற்றிக் கன்னிகளின் விழிநோக்குகளுக்காக – உன் ஆண்மைத் தோள்களை இன்னும் அகல விரி !
உன் கைகளே உனக்குக் கொடிக்கம்பம் !
உன் கண்களே நள்ளிரவின் தெருவிளக்கு !
 
(இளைஞனே ! எனும் நூலிலிருந்து )

---

1	இருக்கு ஆனால் இல்லை...!
		காற்று வெறும் காற்றுதான்! கண்ணுக்குத் தெரிவதில்லை! கைகளுக்கும் கட்டுப்படுவதில்லை!
2	ஓடிவா! ஓய்வறியாது ஓடிவா !
		நடுவண் அரசே! நாசகாரக் கூட்டமே! நானிலமே நகைக்குது நல்லறமெலாம் கரையுது! நாடிது ஆளவா? நாங்களென்ன மாளவா?
3	பொறுத்தது போதும் பொங்கியெழு ..! பொது சிவில் சட்டம்
		ஷரீஅத்தைக் காக்க சதிகாரர்த் தோற்க சகோதர உணர்வில் சங்கமித்து உழைப்போம்
4	வெள்ளைப் பூக்களின் … பயணம் !
		ஹஜ்ஜுக்குச் செல்வோரும் உம்ராவுக்குச் செல்வோரும் அல்லாஹ்வின் விருந்தினர்கள்
5	திரும‌றை வ‌ந்த‌ தேன்மாத‌ம் வ‌ருகிற‌து
		ஈமானில் நாமெல்லாம் எத்தனை மார்க்கென்று தீர்மான‌ம் செய்ய திருநோன்பு வ‌ருகிறது
6	செவி கொடு ; சிறகுகள் கொடு !
7	அழுவதற்கான நேரம் கடந்து விட்டது.!!
8	அழுவதற்கான நேரம் கடந்து விட்டது.!!
9	மரணம்.. ஒரு விடியல்..
10	சொந்த மண்ணில் சொந்தங்களோடு.....
11	வேதம் தந்த மாதம்
12	இது எந்த ஊரு நியாயமுங்க ..........?
13	சொந்தமாகட்டும் சொர்க்கம் !
14	வெயிலும் தங்கும் விந்தை நிழல் !
15	பெருமானே பெருந்தலைவர்
16	பாலஸ்தீனப் பாலகர்களின் அழுகை !!!!!
17	கண்மணி நாயகமே வாழி! - அத்தாவுல்லா
18	கஅபா - அத்தாவுல்லா
19	போக மாட்டார்கள் புதியவர்களிடம் ........